Tuesday, August 28, 2007

أخيرا...رسالة مدينة نصر


اخيرا رسالة مدينة نصر

تخيلوا أن الفرع ده بيعافروا بقالهم 4 سنين عشان يبنوه

الحي كان صعب جدا و الاجراءات كانت فعلا مستحيلة ... ربنا يسامحهم بقي الناس اللي تسببوا في ان خشير يتعطل 4 سنين لكن أكيد بمجرد ان شاء الله كان هذا المبني الرائع و المكان



استنوا انا عايزة أحتفل شوية وأصرخ

اخيرا بقي عندنا فرع رسالة مدينة نصر ياااااااااه

رسالة في مدينة نصر يا بشر

رساله في مدينة نننننصر



قد ايه الناس ده نضيفة ...بجد يا جماعة لو الناس ده ما كانتش ماشية صح مكنش الله وفقهم

ما شاء الله تبارك الله 32 فرع علي مستوي الجمهورية

يلا بقي نبدأ نعمل حاجة الفرصة جت لغاية عندنا مفيش حجج بعد كده

هتقول لربنا ايه و الفرع جنبك في حسنين هيكل و لو مش جنب البيت أوي كأنك رايح جنينة مول و لا الزفت اياه سيتي زفت





النهاردة الحمد لله كان أجتماع د.شريف عبد العظيم بارك الله فيه و جازاه عنا خير الجزاء

هذا الرجل الرجل بمعني الكلمة الذي أحمل له أطنان الاحترام والتقدير

كلامه كان حلو أوي و جميل وما أقدرش ألخصه عشان ما أفقدهوش قيمته

لكن كل الي هقوله من اللي قالوه في الاجتماع

أن اعمل الخير و تمني علي الله ما تشاء و ثق أن الله سبحانه و تعالي هيكرمك بفضله و أن أقل ثواب بعشرة أضعاف

و الله يضاعف لمن يشاء



و الجملة التانية الرائعة

هي أننا اللي بنستفيد من المجهود و من التطوع

الثواب لا يقدر بثمن والشيء الوحيد اللي بيميز الانسان عن الكرسي اللي قاعد عليه هو العمل و ما بذل من جهد لينفع الناس

الكرسي بينفع الناس اللي بيقعدوا عليه ...فلو ما قدرتش تكون أكثر نفعا من الكرسي

فليس هناك ما يميز بينكما بل علي العكس فالكرسي أحسن منك



و أفتكر دايما أن تحمد الله أن وفقك للخير

فأنه ليس مجهودك و لكنها إرادة الله وكرمه عليك أن وفقك للعمل ده



الحمد لله رب العالمين



2 comments:

Heba said...

فعلا الاجتماع مع د/ شريف حمس الواحد بشكل فظيع. بجد جميل أوى ان الواحد يشوف ان لسه فيه خير فى البلد بدل ما هو طول اليوم مش شايف غير السلبيات

والجميل أكتر ان الواحد يعرف ان فيه فرصة يقدر يستعيد بيها انسانيته المفقودة من تانى. هو احنا فرقنا ايه عن المكن والكمبيوتر غير بشوية الاحاسيس والحنان (المشاعر الانسانية يعنى) اللى بنحاول نموتها عشان نعرف نعيش

فعلا هناك الواحد بيحس تانى بآدميته. بيحس انه انسان

Ashraf Al Shafaki said...

خسارة إنى مش شوفت التدوينه ده قبل كده. كنت فرحان جداً بشكل غير عادى لما فتح فرع رسالة فى مدينة نصر، وقلت زيك بالظبط نفس الكلمة: أخيييراً. خساره إنى مش شفت تدوينتك ساعتها. بس الحمد لله، كله بأوانه، شوفتها دلوقتى وأنا بدور فى جوجل على: رسالة مدينة نصر.

على فكره، أنا كتبت برضه عن الافتتاح فى مدونتى وحطيت الخريطه:
http://hregypt.blogspot.com/

حالياً بتطوع فى تدريس الكمبيوتر فى السنتر لذوى الاحتياجات.

كنت فرحان جداً لما فتح فرع مصر الجديدة بدل المشورة لحاد المهندسين. لما فتح بأه فى مدينة نصر كانت الفرحة مش سايعانى، عشر دقايق مشى من بيتى.