Thursday, March 20, 2008

شرخ في جدار نفسي


علي رجلي دم .. نظرت له ما احتملت
علي إيدي دم .. سألت: ليه؟ لم وصلت
علي كتفي دم وحتي علي راسي دم
أنا كلي دم .. قتلت؟ .. والا اتقتلت؟
عجبي

اليوم
بدأ يومي بخبر موجع جداً
جابر الأوفيس بوي السوداني والذي أحبه جداً
الذي أبدأ يومي بكوب من الشاي من صنعه قبل حتي أن أطلبه
في طريقه للعودة إلي بيته طلع عليه 6 حرامية
ضربوه وسرقوا ما معه - وهو ما لا يزيد عن 2 جنيه -
وطعنوه بالمطواة ونزف كثير

بكيت أوي .. كثير
حسيت وقتها بحكمة حد الحرابة
مش كفاية عليه الغربة .. هيسرقوا أيه منه
ماهو باين عليه إنه مش معاه فلوس
طب وبعد ما سرقوه .. يضربوه ليه
وأخذت أتخيل إحساسه الآن
إصابة في قلبه .. وإصابة في جسده
جرح في نفسه .. وجرح في جنبه
نزف لإحساسه .. ونزف لدمائه
أعتقد أن الكلان أحقر من أن يقال في هذا الموضع
لكن ما حدث جعلني أشعر
أن في حاجات وحشة كثير بتحصل بره
ما حدث اليوم قد أحدث شرخاً في جدار نفسي
***********

بالأمس
كنت أترجم طلب لجوء سياسي لأسبانيا يقدمه سودانين نازحين من دارفور

فكنت أقوم بترجمة الكلام لهم ثم كتابة البيانات الازمة

كان هناك جزء خاص بالإضهادات والتعذيب الذي تعرضوا لهم في بلادهم
فسمعت ما تتفطر له القلب منهم

سمعت الكثير ولم يكن موقف بكاء لأبكي كعادتي
فتماسكت عنوة

وعند فقرة كانت تتحدث عن أعمال التطهير العرقي لسكان دارفور بحجة أنهم أفراقة وليسوا عرب
والتمييز العنصري والتعذيب .. كل هذا بإسم الجبهة الإسلامية
وجدت يدي لا تقدر علي كتابة الجبهة "الإسلامية"
.. أن هذا لا يمت للإسلام بصلة
وقفت وقتها وأخذت أفكر .. هل أترجمها أم لا
من المفترض ألا أتدخل .. ولكني أعلم أن هذا الكلامي قد يفهم خطأ
لا أحد في هذا المكان يفهم الأسبانية سواي .. يمكنني ان أكتب ما أشاء
ولكني أعتبرت تغيير الكلام عملاً لا أخلاقياً .. فترجمته

ودعوت الله ألا تنطق يداي يوم القيامة بما كتبت
ولا أعلم حتي الآن إن كان ما فعلته صحيح أم خطأ

ولكن لا شك أن كل هذا الكلام الذي قرأته وسمعته منهم عن التعذيب وعن ما يجدث في دارفور

جعلني أتيقن أن
الناس بتعمل حاجات وحشة أوي بره
ما رأيته بالأمس
قد أحدث لا محالة شرخاً في نفسي
**********
يوم الأثنين الماضي
في طريق عودتي من ندوة مصطفي حسني في زدني
وبعد أن كنت بين صحبة من أفضل الشباب والبنات
الساعة كانت 8 بليل يعني مش متأخر، وكنت في شارع متفرع من عباس العقاد بس الشارع زحمة
بالصدفة البحتة نظرت -لسوء حظي- في مرآة عربتي لأري في السيارة التي تقف خلفي
شابين بيلفوا سيجارة .. وكانت اول مرة أري مثل هذا المنظر
معرفة أن هناك قاذورات في مكان ما شيء .. ورؤيتها شيء آخر

لا أجرؤ علي وصف ما رأيت .. وكيف كانوا ينظروا للسيجارة
ولكني شعرت بامعائي تتقلص وانقبضت ثم بكيت
بدأت أدعو لهم .. أصلهم غلابة أوي
حنقت عليهم جداً .. فقد آذوني جداً جداً

الناس بتعمل حاجات وحشة أوي بره
قد شرخوا جدار براءتي عنوة
قد شرخوا جدار نفسي
***********
وغيرها وغيرها كثيــــــــر
آراه كل يوم
كل هذه الشروخ قد صارت تصدعا
أخشي علي الجدار من السقوط .. من الانهيار
لا أقوي علي محاولات الترميم
كلما رممت شقاً .. ظهر غيره
ليس لي سواك يا ربي يرحم جدار نفسي وبراءتي
فهل تقبلني؟
هل تنقذني؟
فجداري علي شفا الانهيار
****
نوح راح لحاله والطوفان استمر
مركبنا تايهة لسه مش لاقية بر
آه م الطوفان وآهين يا بر الأمان
إزاي تبان والدنيا غرقانة شر
عجبي

14 comments:

JoJosho said...
This comment has been removed by a blog administrator.
سمر said...

الدنيا مليانه بلاوى يا ايمى...
هى كدة ...ربنا بس يكفينا شرورها .ويهدى الناس و يصلح احوالهم ..

بس انا مش عايزاكى تقفى ادام المواقف دى كتير علشان ممتعابيش ..
اللى تقدرى تساعدى بى حد اعمليه

واللى مش هتقدرى ..خلاص ..بس متعذبيش نفسك ..علشان الدنيا مليانه حاجات من دى

استمر فى ابداء اعجابى باسلوبك ..وعلى فكرة انا بينكى روز بس غيرت الاسم

دكتور حر said...

وكذلك كلماتك أحدثت شرخا في نفوسنا

وشرخا في معنوياتنا اتمنى ان نحاول تناسيه لنواصل
ولنربط نفسنا بما هو ابعد
وبما هو عند الله

وأن يجعل لنا ولك من اسمك نصيبا

sola said...

و ياعالم فى ايه تانى مستخبى و مش عارفينه , أكيد فى حاجات و مشاهد أكبر و أخطر م اللى شوفتيها, ربنا يستر
أما بخصوص الترجمة فأنا باعتبرها رسالة أمانه و انتى لازم تأدى الأمانة دى بمنتهى المصداقية و مش كل مسلم يبقى مسلم! ولا تعليق

واصطنعتك لنفسي said...

سمسم
بنكي روز

ميرسي علي تعليقك/طبطبتك عليا
علي فكرة أنا شخصية أبدو دائما متماسكة جداً وخاصة في المصائب والأحداث الكبيرة.. لكن علي قد ما بتماسك بحتاج أفرغ الشحنة ده بيني وبين نفسي
والدموع الصامتة بتريحني
يعني تقدري تقولي كده
i cry silently
i cry inside of me

بس صدقيني يا سمر معرفة أن في حاجات وحشة شيء .. ورؤيتها أو معايشتها شيء آخر
أنا اللي بيؤلمني إني بحس إني بتلوث وبأعرف حاجات وحشة
كان نفسي أفضل عايشة في يوتوبيا كده من خيالي .. كطفلة بريئة لم تر شروراً ولم تتلوث سريرتها


ربنا يعافينا ويعافيكي ويعافي المسلمين أجمعين
ويا رب نقدر نحتفظ ببقايا براءتنا
ومتخافيش عليا .. أنا قوية جداً .. بس من بره بس
:)

نورتيني يا سمر

إيمان

واصطنعتك لنفسي said...

دكتورنا أهلا بحضرتك

أنا بعتذر والله علي هذا الشرخ .. وأعدك أن أحاول أن أرممه ..أرجو أن تسامحني

ربنا يتقبل دعوتك ويبلغنا رضاه
آمين

نورتني
إيمان

واصطنعتك لنفسي said...

سوليتا

وأنا أقول المدونة مضلمـ..إحم إحم قصدي منورة كده ليا
أتاري سنيوريتاسالي تشرفت وعدت ليا
:)

طبعاً حضرتك كنتي بتحاولي تهديني طبعاً

ربنا يسترنا يا سالي ومنشوفش حاجة خالص من البشاعة ده .. أو أن يرزقنا الله القدرة علي تخطي هذه المواقف ويجازينا عنها

أنا فعلاً أعتبرتها أمانة وترجمتها .. أصل كورس
ethics بتاع دكتور شريف اشتغل وقتها

ما تطوليش غيبتك لو سمحتي علشان بيوحشني كلامك

:)

Anonymous said...

Abeer
كلامك حلو فعلا يا ايمان وبيوجع
وعاجبنى اسلوبك اوى
على فكره انا كمان غرت منك وعملت بلوج وعاوزاكى تقوليلى رأيك
هو اقدم من بتاعك بس انا اللى عطلت كتير فى النص
وادى يا ستى اللينك بتاعه
http://abeerelgendy1984.spaces.live.com/

*سمر* said...

انا حاسه قوى بكلامك ..لانى انا كمان نفسى افضل محتفظة ببرائتى ..وفعلا بزعل اوى لما اعرف اى حاجة وحشة ...

فعلا ربنا يعافينا جميعا اللهم امين :)
اتمنى مزيد من التواصل معاكى

Blank-Socrate said...

الاحساس بالناس
و المشاركه الوجدانيه
و دموعك
هى الدليل الوحيد على انسانيتك
دى مش قرود دى انسانيات
يا ريت تحكنا اكتر و اكتر
عن صور من الواقع لكن بعيون انسان
انا سعيد جدا بيك و بمدونتك

واصطنعتك لنفسي said...

Abeer,

Ezaik ya bero,miss u a lot ya benty, didnt see u for a long time but bs2al 3aliky daiman walahy.

thanx a million for z invitation and Sure i'll visit ur blog.

waiting ur visits daiman,

Eman

واصطنعتك لنفسي said...

سمر

إنتي عارفة أنا بس خايفة نتعب ونضطر إننا نستسلم

أو الأسوأ إن الموضوع واحدة واحدة يقلب عادي .. وانا ما بكرهش في حساتي أكثر من العادي

أنا كما حابه جداً إني أتواصل معاكي .. إسمحيلي أزور مدونتك وأبعتلك إيميل

حقاً سعيدة جداً بتواصلي معاكي يا سمسم

إيمان

واصطنعتك لنفسي said...

Blank-socrate

ميرسي علي زيارتك للبلوج وعلي تعليقك الرقيق

هي فعلاً الدليل الوحيد علي إنسانيتنا .. لكنها كمان مؤلمة جداً .. وأنا خايفة أسبب ألم لحد زي ما تألمت .. لإنه لو حدث فساتألم مرتين

ميرسي مرة تانية علي كلماتك التي تعكس إنسان مازل يحتفظ بإحساس حي

إيمان

اغوارى كافكا said...

الواحد يا ايمى بش محتاج يبحث عنك كتير لانك ظاهرة فى كلماتك اى انسان هيقرا كلماتك هيحسك حالمة..شعور بالحنين لذكريات ماضية ..اوجاع من شعور فقد يجعلك هشة كالطفل يمسك برادار يلتقط اوجاع قد استصغرها الجميع امام اهوال اللامعقول عداك اتعرفينى اين تقطن روعتك فى برائتك التى لم تنتزع بعد ..القراءة الكثيرة العميقة قد تقزف جرد ماء ساخن لتقشر هذة البراءة فتبرز الامور امام عينك اسفة طولت عليكى ساصدر مدونة قريبا لى اتمنى لو احصل على شرف المتابعة لاول روايتى ارجو الرد