Tuesday, October 7, 2008

لقطة داخل هذا الصندوق المسمى عقلي


صوت 1: يوووه بقي، هي كل شوية هتدخل وتكتبلها كلمتين.. ما تهدي بقي شوية

صوت 2: ما أنت عارف إنها مضطربة اليومين دول وقلقانة شويتين.. سيبها تطلع الطاقة في الكلام

صوت 3: بس تستقر علي حالة .. لكن بوست نكد وبوست فرح وبعدين في الجنان ده بقي

صوت4 : ساكته طول النهار في البيت بشكل مريب.. ومع اصحابها معندهاش غير الحمد لله.. وبتطلع الجنان كله علي المدونة

صوت5 : يا جماعة المدونة بتاعتها .. من حقها تتجنن فيها براحتها

صوت 6 : لأ .. لازم تهدي شوية وتعقل.. مالها مبتستحملش خالص كده ليه؟.. ما تثبت شويه هي مابقتش طفلة

صوت 7: حرام عليك بقي هي كده ما بتستحملش.. ما هو بردو اللي بيحصل لها يحير .. وبعدين ما انت عارف انها لوحدها

صوت 8: ما تروح تشوف الشغل اللي هيتسلم كمان كام يوم .. ده معاها شغل كثير اوي هتفضل تضيع في الوقت وتيجي تزنق في الآخر وتباتلها علي الكمبيوتر اربع تيام لغاية لما تخلصه

صوت 9: وانت مالك!! مش في الآخر بتسلمه في الميعاد وزي الفل .. هي حرة بقي

صوت 10: بصراحة هي لسه ما قصرتش في اي حاجة.. كل حاجة المفروض تعملها بتتعمل ..واكيد هي بشر بيحتاج يفضفض

صوت 11: قصدك تقول ان اليومين الجايين دول هتقضيهم مهيبره كده .. طيب ومين هيستحمل الجنان ده

صوت 12: وايه يعني ..ما هي بقالها 22 سنة عاقلة ومتزنة.. من نفسها بقي شويه

صوت 13: بصوا طالما لسه مش بتأذي حد سيبوها تجنن .. لو بدأت تأذي نفسها يبقي حد يقوم يديها قلمين تفوق

صوت 14: مش احسنلها تطلع الطاقة ده في غسيل المواعين.. ولا حتي تاكلها لقمتين كده بدل ما هي قارفاهم في البيت علي الأكل

صوت 15: زززز اففففف بوم بم طاااااخ طوووخ طيييييخ يععععع طشش زووووو يااااااهوووووووو

***********
عزيزي القاريء لا داعي للقلق علي الحالة العقلية لصاحبة المدونة .. وإذا كنت مصمم علي الشعور بالقلق.. يمكنك ترك دعوة حلوة بالخير.. وسوف نوافيكم بآخر أخبار حالتها تباعاً
**********
لسه في أمل يا دكتور؟؟
احنا هنعمل اللي علينا والباقي علي ربنا
*********
شمس النهار هتجيني
هتغني وتصحيني
غنوة أمل وحياة
ولا عمري سمعتها
-
عصفور جناحه حرير
هيطير لفوق ويطير
يحكيلي عن أساطير
ولا عمري سمعتها
-
الكون هيضحك تاني
والنور هيستناني
اضحك خلاص يا زماني
ما الفرحة عرفتها
الفرحة عرفتها

13 comments:

Anonymous said...

:)حلوة حلوة حلوة قوى
ما يدور بعقلك يستحق الاحترام وعلى العلم ما به من افكار وارهاصات عادى وطبيعى وبيحصل لكل الناس.
** احترف الأن دور الدكتور وانصحك "بشرب 3 كوبيات مياة بعد الأكل 3 مرات لمدة اسبوعين وكله حيكون تمام والاستشارة بعد أسبوع.
شفاكى الله وعفاكى

Anonymous said...

الأنسان كائن تاتي عليه لحظات ضعف ولحظات قوه, لكن الصح ان احنا منسبش لحظات الضعف تأخد وقت كبير منا ونقضي عليها فوراً
ان شاء الله تنحل اي مشكله موجوده عندك عن قريب جداً , فالله لا ينسي عباده المخلصين

إِيمَان عَاطِفْ said...

خيييييييييير خير
ان شاء الله
"الفرحه عرفتها"
ربنا يفرحك يارب ويسعدك ويرسيكى على بر ياااااااااارب
________
مش بعتيلى ميلك يعنى!!
كنت عاوزاكى
:)
ممكن ولا...

حزيــــــــــــــــــن said...

هو دا الطبيعى مع الناس اللى بتفكر

Ahmad Hegab said...

Only 15 voice !!! feen el ba2yyy =)

اوعى يجيى يوم و تكبرى .. خلى الطفله اللى جواكى عايشه لحد ما يكون عندك 80 سنه ... اضحكى لما تحبى تضحكى غنى ما وقت ما تحبى .. كلى على الرصيف فى الشارع انفخى بالونه و اقفى فى البلكونه..خليكى دايما مندفعه زى الاطفال .. اى حاجه اهم حاجه الطفله اللى جواكى تفضل جواكى

بما انى فى المكتب من امبارح لوحدى احب اقولك انى شغلت شمس النهار و الصوت على اخره و بغنى بصوت عالى... اصلا الاغنه دى بتجنينى

mohamed said...

هايل..

معرفش ليه البوست دا لقيته معبر أوي

عصفور المدينة said...

عارف أنا الموضوع ده كويس

بس إيه حكاية يععععع
اللي في وسط مجموعة الأصوات

syzef said...

الموضوع طبيعي جدا وبيحصل لينا كلنا ف فترات ضعفنا احتياجنا جنوننا اتزاننا بيحصل دايما مع الناس اللي ليها عقل اصلا..ماهو في ناس بتو كبــّر ونــفّض دول اعتقد ان اللقطة دي بعيد شوية انهم يشوفوها او يلاحظوها داخل تلك الغرفة الصغيرة زي مانتي قلتي

اللي هو مش طبيعي بقي ان الخواطر دي تترجم حروف وكلمات ..اعتقد ان دي مرحلة تطورية لفكرة الخواطر اللي بتحصلنا كلنا ودي مش هتحصل الا برده لعدد محدود من اللي بيفكروا بالاسلوب ده..اللي هما ليهم القدرة انهم يخرجو اللي جواهم..انا حاولت قبل كده اترجم اللي بيدور جوايا بفضفضة كده ومقدرتش

لكن انتي بنصحك انك تستمري..لاني اعتقد ان التفكير بصوت عالي ده هو الخطوة الاولي للاستقرار والاتزان المفتقد

علي صوتك اكتر.. وتاكدي ان ده سلوك الانسان الطبيعي

البوست مميز علي فكرة وممتع

تحياتي.

كرانيش said...

قول ياللى لسه القول مايعرف سكتك
اصرخ بعزم مافيك وبقوتك
اوعاك تموت بالخرس نفسك
اوعاك تقول مش سكتك
غنى ولا يهمك
اصرخ ولا يهمك
عافر وقاوح
مل البكا من لون عنيك
مل البكا منك



كونى بخير
على فكره الخمستاشر صوت
لازم ميفرقوش معاكى
كونى كما انتى

Anonymous said...

LoCAAAA
Agmed soot N15 , hwa da b2a soot el mwa3en?!!

Keep it niñtaaaa

Sally

واصطنعتك لنفسي said...

Mona,
3كوبيات!!!..هو أنا مقلتلكيش قبل كده إني عمري ما بسمع كلام الدكتور :))


@ Mutation
صعبتها علي والله بتحديدك المخلصين
آمل في إن الله لا يترك عباده الضعفاء
وأسأل الله أن يجعلني من المخلصين

جزاك الله خيراً


@إيمان عاطف
آمين يا رب يا إيمي
ميلك وصل يا فندم والرد في الطريييييق
:))
نتقابل قريب اوي ان شاء الله

@حزيــــن
غريبة!!!.. يبقى بيحصل معايا ازاي بقى

@Ahmed-H
ايه دا؟ عرفت ازاي؟؟
.
بس أنا ما اقدرش اعمل حركات الجنان ده إلا في البيت بس.. بس

@Mohamed
فعلاً؟؟
طب يا ترى ده مدح للبوست ولا ذم للتدوينات الأخرى!!!
:)

@عصفور المدينة
يعععععع ده.. هي رأيي الشخصي في الأفكار
:)
شرفت يزيارة حضرتك جداً

@سيزيف
شكراً لتشجيعك الجامد ده
إن شاء الله هو بداية استقرار مرتقب جداً.. إن شاء الله

@كرانيش
يأااه
الأبيات أبلغ ميت مرة من البوست
إن شاء الله سأكون كما أنا..فقط ..وكما ينبغي

شرفت بتعليقك ومرورك
:)

@ سالي
صوت المواعين؟؟.. طب لما اشوفك يا سالي هوريكي المواعين شخصياً علي الطبيعة بقي
:))

Gracias amorcita


ُإيمان

أمة الرحمن said...

رائع البوست يا إيمان
الشيئ الجميل إن إنتي معتبراه جنان
إذا كان الجنان بهذا الجمال وبهذه القيمة فأتمنى أن يصيب هذا الجنان كل الناس حتى يكون عندهم هذا الإبداع الذي عندك.
وفقك الله ونتمنى الكثير من هذا الجنان يا فندم ياريت متحرمناش منه
إلى اللقاء يا أجمل إنسانة رأيتها في حياتي.

Y2J said...

اللهم اسعدها في الدارين وحقق جميع احلامها وكن لها ولا تكن عليها

انا لا اعرفها وهي لا تعرفي ولكن يكفي انها سألتنا الدعاء ونسألك اللهم الاجابة