Monday, December 1, 2008

لبيك ربي

لبيك اللهم لبيك
لبيك لا شريك لك لبيك
ان الحمد والنعمة لك والملك
لا شريك لك
..
وانا صغيرة لما كانت ماما يوم وقفة عرفات تشغل التليفزيون عشان نسمع صوت التلبية ونشهد وقوف الحجاج علي عرفه
انا كنت اقعد اكرر التلبية وماما تحاول تسكت فيا عشان تسمع الخطبة وصوت الحجاج وانا ما اسكتش ابداً واستمر في تكرير التلبية باستمتاع شديد
من زمان اوي بيهزني صوت الحجاج
رغم اني ماكنتش اعيي المناسك
وكان كل اللي يهمني ان يوم العيد يجي بسرعة
عشان البس لبس العيد وننزل كلنا نصلي العيد واتفرج على الخروف وهو بيدبح
والعجيب اني كنت بكرر التلبية في ايام تانية من السنة واقول لماما هو امتي هيجيي بقى اليوم اللي بنقول فيه لبيك اللهم لبيك
..
السنة ده احساسي بالعشر الاواخر مختلف جداً
احساس غريب بالمصالحه مع كل شيء حولي
احساس ببداية جديدة
بتكوين جديد
.
من فترة قصيرة كنت بحضر محاضرة لمصطفي حسني في زدني وفجأة بحماس غريب لقيت مصطفي حسني بيقول يا شباب مين نفسه يطلع عمره؟؟..وبعدين راح مكمل انا طالع عمره ان شاء الله وبدأ يتكلم عن التفاصيل عشان لو حد من الشباب نفسه يطلع معاه
الفترة ده تصادف اني كنت مشتاقة جداً اني اعتمر ومفيش مشكلة في الفلوس لكن ظروف أخرى لا يد لأحد فيها تمنعني
انا اول ما سمعت الكلام ده لقيتني بعيط جامد اوي وسط الناس رغم اني مابعملش كده ابداً بسهولة
الغريب بقى ان وقتها مصطفي حسني راح قايل
يا جماعة لما انا جبت سيرة العمره في حد بكى بحرقة
اكيد كان نفسه يطلع ويمكن في ظروف منعته
يا جماعه اوعوا يكون في حد من جواه زعلان من ربنا ان ربنا لم ييسر له العمره او الحج
صدقوني يا جماعه لما ربنا يأذن لا حتعرف ازاي ولا منين
ربنا هييسر وتطلع علطول
يا جماعه انا كنت زمان لما اشوف الموبايل اقول معقوله يا مصطفي هيجي يوم وتشتري موبايل
ولا عمري كنت اتخيل ان ربنا يكرمني هذا الكرم البالغ
واسافر اعتمر وحج
.
انا لما سمعت الكلام ده ابتسمت وضحكت من جوا اوي
فهمت الرسالة الربانية
وحسيت كما لو كان الله بيجبر خاطري وكسري
كما لو ان ربنا بيطبطب عليا وبيقولي ما تزعليش
وخاصةاني كنت قاعده في القاعة بعيد ومش ممكن يكون مصطفي حسني يكون شافني وانا بعيط
.
من يومها كل ما اسمع صوت التلبية أو اشتاق للعمره
افتكر كلامه وابص جوه قلبي كويس جداً واقول لنفسي
اوعي تكوني من جواكي زعلانة من ربنا
.
وأنا أشهدك يا ربي علي قلبي الآن
انا مش زعلانة
انا موقنه ان وجودي هنا الآن هو الخير
كل الخير
وانه عندما تأذن فسأسافر إن شاء الله
فلك الحمد يا حنان
لك الحمد كما ينبغي لجلال وجهك ولعظيم سلطانك
لك الحمد ملأ السموات وملأ الأرض وملأ كل شيء بعد
.
كل سنة وانتم طيبين
للأسف هيمر وقت طويل قبل ما يكون في نفحات زي العشر الأوائل من ذي الحجة
ولسه رمضان للأسف بعيد
ربنا يقدرنا وما تتفلتش مننا الايام ده وسط زحمة الحياة والشغل
تقبل الله منا ومنكم

13 comments:

أليس في بلاد العجائب said...

السلام عليكم ورحمة الله وبركاته

كل سنة وانتي طيبة ويارب يرزقك وايانا حجا مبرورا مقبولا العام القادم ان شاء الله

وانا بقرأ كلامك فكرتيني بنفس اليوم في بيت جدتي وسط خالي الله يرحمهم جميعا وامي و بنتفرج علي الحجاج والتلبية و اشوف خالي وامي دموعهم منهمرة و جدتي لسانها بيردد التلبية

الله يرزقنا اياها ياااااااارب وكل اللي يهفو قلبه لها يارب لا تحرمه منها

ابكاني حديثك عن مجلس العلم اللي كنتي فيه .. ربنا مفيش اكرم منه .. صدق اللي قال ما حرمك الا ليعطيك

لما حرمني من اني اروح العمرة اكتر من مرة صحيح كرمني بكذا حاجة تانية ولا كنت احلم انهم يحصلوا و ساعات كنت بفكر اني مستهلهاش علشان كده ربنا مش عايزني بس لما بلاقيه بيكرمني في حاجة تانية بصبر نفسي واقول معلش يمكن لسه لم يأن الاوان

ربنا يرزقنا رضاه يارب

كل سنة وانتي طيبة

معلش طولت عليكي بس اسعدني جدا مشاركتك مشاعرك

الله يباركلك
السلام عليكم

كريم عبد المجيد said...

ربنا يكتبهالنا جميعاً بأذن الله في يوم من الأيام

ahmEd_H said...

لبيك الله اللهم لبيك لبيك لا شريك لك لبيك ان الحمد و النعمة لك و الملك لا شريك لك

نداء ليس كمثله نداء اخر
نداء يليق بعظمة و وحدانية الخالق عز و جل

لبيك اللهم لبيك لبيك لا شريك لك لبيك ان الحمد و النعمة لك و الملك لا شريك لك

و انتى بالصحه و السلامه و انشالله العام القادم تقفى بين الحجاجفوق عرفات
امين

shaimaa samir said...

هى دى يا ايمان

ربنا يقدرنا وما تتفلتش مننا الايام ده وسط زحمة الحياة والشغل


الله المستعان

ادعيلى بقلبك

mona m. monged said...

أكرمنا الله وإياكم بزيارة البيت..
وأحلّ عليكم رضوانه الأكبر، وضاعف لكم الأجر من فيض كرمه وجليل إحسانه..
وأسمى أرواحكم بالروضة النبوية المطهرة..
تقبل الله منا ومنكم
تلقينا الرسالة: حقاً ربنا يقدرنا وما تتفلتش مننا الايام ده وسط زحمة الحياة والشغل
جزاكى الله خير الثواب

م/ الحسيني لزومي said...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا

ـ-ـ- أحمد عبد العدل-ـ-ـ said...

ربنا يكتب لحضرتك الخير حيث كان ويوفقك لما يحبه ويرضاه
كل سنة وحضرتك بكل خير

المحارب المتيم said...

السلام عليكم

جميلة جدا مدونتك أختى

اخذت جولة سريعة على الموضوعات السابقة

وأعجبنى بشدة موضوع

الشطحات الشتوية وموضوع فعل التحرير

كل ما يمكننى قوله

وفقك الله على ما أنت عليه

وكتب لنا ولك العمرة والحج

تحيتى وتقديرى

دكتور حر said...

أجمل ما في الموضوع
هو احساسي بالحوار بينك وبين نفسك

حوار أدام الله عليكي نعمته

آمين

مصراوي أوي said...

كل سنة وانتي طيبة

وربنا يرزقنا واياكي حج بيته الحرام

أحمد كمال said...

ربنا يوعدك بالوقوف بعرفة قريبا جدا إن شاء الله :)

لبيك اللهم لبيك
لبيك لا شريك لك لبيك
ان الحمد و النعمة لك و الملك
لا شريك لك

المستنصر بالله said...

كل سنه وحضرتك بخير
رزقك الله بحج بيته الحرام

عيد اضحى مبارك

تحياتى

DR.HAMAS said...

ربنا يرزقك العمرة و الحج كمان

ليس هذا على الله بعزيز

بالفعل أكثر ما يؤثر فى النفس عن الحج هو التلبية

ذلك و من يعظم شعائر الله فإنها من تقوى القلوب

و هذا دليل على تقوى قلبك

ربنا يبارك لك و يرزقك ما تتمنين





د.حماس