لبيك ربي

لبيك اللهم لبيك

لبيك لا شريك لك لبيك

ان الحمد والنعمة لك والملك

لا شريك لك

..

وانا صغيرة لما كانت ماما يوم وقفة عرفات تشغل التليفزيون عشان نسمع صوت التلبية ونشهد وقوف الحجاج علي عرفه

انا كنت اقعد اكرر التلبية وماما تحاول تسكت فيا عشان تسمع الخطبة وصوت الحجاج وانا ما اسكتش ابداً واستمر في تكرير التلبية باستمتاع شديد

من زمان اوي بيهزني صوت الحجاج

رغم اني ماكنتش اعيي المناسك

وكان كل اللي يهمني ان يوم العيد يجي بسرعة

عشان البس لبس العيد وننزل كلنا نصلي العيد واتفرج على الخروف وهو بيدبح

والعجيب اني كنت بكرر التلبية في ايام تانية من السنة واقول لماما هو امتي هيجيي بقى اليوم اللي بنقول فيه لبيك اللهم لبيك

..

السنة ده احساسي بالعشر الاواخر مختلف جداً
احساس غريب بالمصالحه مع كل شيء حولي

احساس ببداية جديدة

بتكوين جديد

.

من فترة قصيرة كنت بحضر محاضرة لمصطفي حسني في زدني وفجأة بحماس غريب لقيت مصطفي حسني بيقول يا شباب مين نفسه يطلع عمره؟؟..وبعدين راح مكمل انا طالع عمره ان شاء الله وبدأ يتكلم عن التفاصيل عشان لو حد من الشباب نفسه يطلع معاه

الفترة ده تصادف اني كنت مشتاقة جداً اني اعتمر ومفيش مشكلة في الفلوس لكن ظروف أخرى لا يد لأحد فيها تمنعني

انا اول ما سمعت الكلام ده لقيتني بعيط جامد اوي وسط الناس رغم اني مابعملش كده ابداً بسهولة

الغريب بقى ان وقتها مصطفي حسني راح قايل

يا جماعة لما انا جبت سيرة العمره في حد بكى بحرقة

اكيد كان نفسه يطلع ويمكن في ظروف منعته

يا جماعه اوعوا يكون في حد من جواه زعلان من ربنا ان ربنا لم ييسر له العمره او الحج

صدقوني يا جماعه لما ربنا يأذن لا حتعرف ازاي ولا منين

ربنا هييسر وتطلع علطول

يا جماعه انا كنت زمان لما اشوف الموبايل اقول معقوله يا مصطفي هيجي يوم وتشتري موبايل

ولا عمري كنت اتخيل ان ربنا يكرمني هذا الكرم البالغ

واسافر اعتمر وحج

.

انا لما سمعت الكلام ده ابتسمت وضحكت من جوا اوي

فهمت الرسالة الربانية

وحسيت كما لو كان الله بيجبر خاطري وكسري

كما لو ان ربنا بيطبطب عليا وبيقولي ما تزعليش

وخاصةاني كنت قاعده في القاعة بعيد ومش ممكن يكون مصطفي حسني يكون شافني وانا بعيط

.

من يومها كل ما اسمع صوت التلبية أو اشتاق للعمره

افتكر كلامه وابص جوه قلبي كويس جداً واقول لنفسي

اوعي تكوني من جواكي زعلانة من ربنا

.

وأنا أشهدك يا ربي علي قلبي الآن

انا مش زعلانة

انا موقنه ان وجودي هنا الآن هو الخير

كل الخير

وانه عندما تأذن فسأسافر إن شاء الله

فلك الحمد يا حنان

لك الحمد كما ينبغي لجلال وجهك ولعظيم سلطانك

لك الحمد ملأ السموات وملأ الأرض وملأ كل شيء بعد

.

كل سنة وانتم طيبين

للأسف هيمر وقت طويل قبل ما يكون في نفحات زي العشر الأوائل من ذي الحجة

ولسه رمضان للأسف بعيد

ربنا يقدرنا وما تتفلتش مننا الايام ده وسط زحمة الحياة والشغل

تقبل الله منا ومنكم